Skip to main content

இளங்கோ புரோட்டா ஸ்டால்



ஷங்கர்ராமசுப்ரமணியன்




ஊருக்கு வரும்போதேல்லாம்
திருநெல்வேலி சந்திப்பிள்ளையார் முக்கு
இளங்கோ புரோட்டாக் கடையில்
ஆஜர் ஆகிவிடுவான் சங்கரன்.
நள்ளிரவில் இரண்டாம் காட்சி பார்த்துவிட்டு
வீடு திரும்பும்போதும்
இளங்கோவை அவன் புறக்கணித்ததில்லை.
இப்போது அவனுக்கு வயது நாற்பது.

மஞ்சள், கரும்பழுப்பு, செக்கச்சிவப்பு
மூன்று குழம்புகளையும் ஊற்றச்சொல்வான்
முதிய பரிசாரகனின் கருப்புக் கைகளும் சேரவேண்டும்.
புரோட்டோவை ஆசையோடு பிய்க்கச் சொல்வான்.
எலும்புத் துணுக்குகளை
இலையோரம் ஒதுக்கி வைப்பான்
சைவக்குடும்பத்தில் பிறந்த சங்கரன்.
முதல்முறையாக
ஒன்பது வயதில்
அப்பாவோடு
ரொட்டி சால்னா அறிமுகம் ஆனது.
கோழி எலும்புகள் தான்
செதில்செதிலாக புரோட்டா ஆகிறது
என்று கற்பனையும் செய்தான்
இப்போதும் 
சொந்த ஊர்
திருநெல்வேலிக்கு வரும்போது
தாபத்துடன்
ஏலக்காய் மணக்க மணக்க
புரோட்டா சாப்பிடுகிறான்.
அல்வாவைப் போலவே
புரோட்டாவையும்
தாமிரபரணிதான் ருசிக்கவைக்கிறது 
என்பது அவன் முடிவு.

வெங்காயம் நிறைந்த
உடல் பூரித்த ஆம்லேட்டை
அசௌகரியத்தோடும் வலியோடும்
மெதுவாக மென்று மென்று தின்கிறான்

தனது கடைவாய் பற்குழியை
மருத்துவரிடம் நேற்றுதான் அடைத்துவந்த
நாற்பது வயது சங்கரன்
இன்று

சந்திப்பிள்ளையாரையும்
இளங்கோ ஹோட்டலையும்
பால்யகால நண்பர்களைப் போல
மறக்காமல் இருக்கும்
அவன்
எப்போது
புரோட்டாவை வாயில் வைத்தாலும்
அப்போதெல்லாம்
அவனுக்கு ஒன்பது வயதுதான்.

(கவிஞர் ஞானக்கூத்தனுக்கு)

Comments

Popular posts from this blog

ஆத்மாநாம் கேட்கச் சொல்லும் பிச்சை

நீ ஒரு பிச்சைக்காரனாய்ப் போ பிச்சை பிச்சை என்று கத்து பசி இன்றோடு முடிவதில்லை உன் கூக்குரல் தெரு முனைவரை இல்லை எல்லையற்ற பெருவெளியைக் கடக்கணும் உன் பசிக்கான உணவு சில அரிசி மணிகளில் இல்லை உன்னிடம் ஒன்றுமேயில்லை சில சதுரச் செங்கற்கள் தவிர உனக்குப் பிச்சையிடவும் ஒருவருமில்லை உன்னைத் தவிர இதனைச் சொல்வது நான் இல்லை நீதான். - ஆத்மாநாம்
ஆத்மாநாம் எழுதிய‘பிச்சை’எனும் கவிதையின் உள்ளடக்கத்துக்குப் போகும் முன்பாக அதன் குரல்,தொனியின் சிறப்பைக் கவனிக்க வேண்டும். யாருடைய குரல் அது என்று கேட்டுப்பார்க்க வேண்டியிருக்கிறது. அந்தக் குரலையுடையவன் எங்கே நிற்கிறான் என்பதைக் கேட்டுப்பார்க்க வேண்டியிருக்கிறது. உரத்துப் பேசுபவன்போலத் தொனித்து,கடைசியில் மோனத்துக்குள் உறையவைக்கும் அனுபவம் உள்ளது. சாதாரணன்போல இந்தக் குரலையுடையவன் தெரிகிறான். அவன் பேசுவது சகஜ ஞானம்போல இருக்கிறது. உச்சாடனம் கட்டளையிடுதலின் சமத்காரம் இருக்கிறது அந்தக் குரலில்.
பிச்சையும் யாசகமும் வாழ்க்கை முறையாக மெய்தேடுதலுக்கு உகந்த நெறியாகப் பார்க்கப்பட்ட ஒரு நிலத்தில் ஒரு குறிப்பிட்ட காலகட்டத்தில்‘நீ பிச்சைக்காரனாய்ப் போ’என்பது வசையாகவும் சாபமாகவும் அர்த்தம்…

சிமெண்ட் நிறக் காரில் வருபவர்கள்

அந்த மழைக்கால ஓடை இப்போது
நீர் வற்றியிருக்கிறது
சென்ற வருட மழைக்குப் பின்
தினம்தோறும் காலையில்
நான்கு யுவதில் அங்கே
படகு செலுத்த வருவார்கள்
பேருந்தில் பாலம் கடக்கும்
என்னை அவர்களுக்குத் தெரியாது
அவர்கள் சிமெண்ட் நிறக் காரில்
வருவார்கள்
அந்தக் கார்
மரத்தடி நிழலில்
இளைப்பாறும் காட்சி அலாதியானது
மழைக்கால ஓடையில் நீர்குறைய
அவர்கள் அங்கே வருவதில்லை
படகு தனியே நின்று கொண்டிருக்கிறது
கோடை முடிவடையும் அறிகுறிகள்
ஆரம்பமாகிவிட்டன
இன்னும் சில தினங்களில் மழைபெய்யக் கூடும்
அவர்கள்
சூரியன் வரும்போதே
குதிரைவால் சடையுடன்
ஓடைக்குப் படகு செலுத்த வந்துவிடுவர்
படகு இப்போது தனியே
நின்று கொண்டிருக்கிறது.

எரிந்துபோன பாரிஸின் இதயம்

ஈபிள் கோபுரத்துக்கு முன்னரே நூற்றாண்டுகளாக பாரிஸின் சின்னமாக இருந்த நோத்ர தாம் தேவாலயம் கடந்த திங்களன்று எரிந்துபோனது. நோத்ர தாம் என்றால் புனித அன்னை என்று அர்த்தம். உலகமெங்கும் வாழும் கத்தோலிக்கர்களுக்கான புனிதத் தலங்களில் ஒன்றாக விளங்கும் இந்தத் தேவாலயம் வரலாற்றுரீதியாகவும் பண்பாட்டு அளவிலும் கட்டிடக் கலை சார்ந்தும் முக்கியத்துவம் வாய்ந்தது. “நோத்ர தாம் தேவாலயம் பிரெஞ்சு மக்கள் எல்லாருக்குமுரியது; இதுவரை அங்கே போயிராதவர்களுக்கும்” என்று கூறியிருக்கிறார் அந்நாட்டின் அதிபர் இமானுவேல் மெக்ரான்.
ஆறாம் ஹென்றி முடிசூடிய, நெப்போலியன் பேரரசனாகப் பதவியேற்ற இடம் இது. 1163-ம் ஆண்டிலிருந்து 1345 வரை கட்டி முடிப்பதற்கு ஒன்றரை நூற்றாண்டை எடுத்துக்கொண்ட தேவாலயம் இது.
விக்டர் ஹ்யூகோவின் நோத்ர தாம்