Friday, 4 May 2018

தொட்டில் ஆடிக்கொண்டு தான் இருக்கிறது


எங்கே ஆடுகிறது
அந்தத் தொட்டில்
என் குழந்தை வளர்ந்து விட்டாள்
ஆனால் தொட்டில்
ஆடும் சத்தம் கேட்கிறது
தூளியை ஆட்டி
ஞாபகமிருந்த ஒரே ஒரு தாலாட்டைப்
பாடிய
பெரியம்மாவும் இப்பூமியில் இல்லை
ஆனாலும் தொட்டில்
ஆடிக்கொண்டு தான் இருக்கிறது.
தொட்டில் கம்பு கொண்டுவந்த
நெல்லையப்பன் அத்தான்
இப்போது இல்லை
ஆனாலும் தொட்டில்
ஆடிக்கொண்டு தான் இருக்கிறது.
முதல்முறையாக
வண்ணங்களை என் மகள் அறிவதற்கு
சொல்லித்தந்த
கிளி
எங்கே போனது
தெரியவில்லை
ஆனாலும் தொட்டில்
எங்கோ ஆடிக்கொண்டு தான் இருக்கிறது.



No comments:

மொழியின் உயிர்த்துடிப்பு கவிதை

தமிழ் புதுக்கவிதையில் தனிப்பட்ட பேச்சின் அந்தரங்கமும் இசைமையும் கொண்ட கவிஞராக கோடைக்கால குறிப்புகள் தொகுதியின் மூலம் அறிமுகம...