மியாவ் மியாவ் மியாவ்

  

தாய்ப்பாலுடன் சேர்ந்து

பருப்பு சோறு

சாப்பிடத் தொடங்கும் போது

குழந்தைகளுக்கு

பூனை மீசை வளர்கிறது

பூனைகளுக்கும்

எனக்கும் மட்டுமே தெரியும்

மீசை அது

அம்மாவின் ரத்தம் குடித்து

வளர்ந்த மீசையாக்கும்

என்று ரகசியமாய்

தெரிவித்து

வாயைச்

சப்புக்கொட்டுகிறது

குழந்தை.

000

புழக்கடையில்

என்ன சத்தம் என்கிறாள்

காக்காய் கரைகிறது

என்றேன்

வித்தியாசமாக இருப்பதாகச் சொன்னாள்

அப்படியாவென்று கேட்டு

அடுப்பங்கரைப் பால்கனிக்குப் போய்

நானும் சேர்ந்து கரைந்தேன்

ஆமாம்

அவள் சொன்னது சரிதான்

எங்கள் கரைதலுக்கு உள்ளே

மியாவ்

மி…..யா…..வ்

மி……….யா……….வ்

இருக்கிறது.

5

உனது கடைசிப் பூனைக் கவிதையை

எப்போது எழுதப் போகிறாய்?

இப்படி ஒரு குரல் கேட்டது

விழித்தேன்

முதலில் பயந்து

பின்னர் தளர்ந்து சிரித்தேன்

கடைசிப் பூனையைப் பார்த்த பிறகு

போதுமா என்று

பதிலைச் சொல்லி

புரண்டு கொண்டேன்.

000

முகத்தை உற்றுப் பார்

பூனையிலிருந்து

மிகத்தொலைவில்

அடர்ந்த இருளுக்குள்

உள்ளது

புலி

புலியின் முகவாட்டம்

குலைந்த ஜியோமிதி

அதில் தெரியும் மடத்தனம்

குழந்தைமை

நிர்வாண வேட்டை

பூனையில் இல்லவே இல்லை.