நகரம் நீங்கியிருப்பேன்

உன்

பொம்மைகள்

நீ தவழ்ந்து கடக்கும் கதவுகள்

புழங்கும் அறைகள்

சுவர்கள்

அம்மா அப்பா

எல்லாரையும் எல்லாவற்றையும்

உன் குட்டி நாவால்

சப்பி அறியும்

என் கிளிச்சிறுமி நீ.

இரவு நீ உறங்கும்போது

நான் வேட்டைக்குச் செல்வேன்

நிலவுகள்

ஒட்டகங்கள்

கதைகள்

கடவுளர்கள்

காதல்கள்

எல்லாவற்றையும்

உன் சிறு கையளவு வடிவங்களாக

மாற்றி

உன் முன் பரிசுகளென விரிப்பேன்

அவற்றை நீ உன் இருகை பற்றி

உன் நாவால் அறியத் தொடங்கும்

போது

உன் தந்தை நான்

நகரம் நீங்கியிருப்பேன்.