Skip to main content

புரோட்டா-ஒரு பண்பாட்டுக் குறிப்பு




ஷங்கர்ராமசுப்ரமணியன்




(சிறுவயதிலிருந்து எனது கனவு உணவாகவும், நிறைவேறாத எத்தனையோ ஆசைகளின் எளிய வடிகாலாகவும் இன்றும் இருக்கும் புரோட்டா குறித்த சில குறிப்புகள் இவை. புரோட்டா குறித்து விரிவான ஆய்வைச் செய்யவேண்டும் என்பதும், புரோட்டா குறித்த ஒரு ஆவணப்படத்தை எடுக்கவேண்டும் என்பதும் எனது நிறைவேறாத திட்டங்கள். நான் தான் தமிழ் புரோட்டா என்ற என்னுடைய கவிதையில், புரோட்டா எனது ஆசைப்படி ஒரு படிமமாக மாற்றப்பட்டது. இந்தக் கட்டுரையின் சற்று பெரிய வடிவம், 2000 ஆவது ஆண்டில் குமுதம் இணையத்தளத்துக்காக எழுதப்பட்டது. அதன் பிரதி என்னிடம் தொலைந்து போய்விட்டது. 2009 ஆம் ஆண்டு பேராசிரியர் பக்தவத்சல பாரதி கேட்டுக் கொண்டதற்கிணங்க ஞாபகத்திலிருந்து மீண்டும் எழுதப்பட்டது. ஆனால் அவர் எதிர்பார்ப்புக்கு ஏற்ப விரிவான ஆய்வுக்கட்டுரையாக அமையவில்லை. அதற்குப் பின்னர் இது என்னிடமே தங்கிவிட்டது. இப்போது இங்கே வெளியாகிறது. என் அப்பா குறித்து  எத்தனையோ புகார்கள் உண்டு. ஆனால் புரோட்டாவையும், பிரியாணியையும் அவர் அறிமுகப்படுத்தியிருக்காவிட்டால் எனது வாழ்க்கையில் அவற்றின் ருசி தெரியாமலேயே போயிருக்க வாய்ப்புண்டு. தூத்துக்குடியில் கிளியோபாட்ரா திரையரங்கு அருகே ட்யூப்லைட்களின் அதீத ஒளியில் முதல் முறை புரோட்டா சாப்பிட ஒரு நைட் கிளப்புக்கு அவர் அழைத்துச் சென்ற நாள் எனக்கு இன்றும் ஞாபகத்தில் உள்ளது.)

தமிழகத்தில் புரோட்டாவின் உருவாக்கமும்,அதன் தனித்துவமும் சரித்திர முக்கியத்துவம் வாய்ந்தது. சமையலறை வெளிப்படையான காட்சி அரங்க வெளியாக மாற்றம் அடைந்தது, தமிழகத்தில் முதலில் பரோட்டாக் கடைகளில் தான். வேறு வேறு பேச்சு வழக்குகள், பழக்கங்கள்,பண்பாட்டுக் கூறுகளால் ஆன தமிழகத்தின் ஒவ்வொரு ஊரின் விளிம்பையும் தன்  வசீகரத்தால் இணைப்பது புரோட்டாக் கடைகள் தான்.
உயர் வர்க்கத்தினர் மட்டுமே புழங்கிய இடமாக இருந்த காபி கிளப்களில் சமையலறை கண்ணுக்கு தெரியாத ரகசிய வெளியாக இருந்தபோது, சமையலறையை தெருவுக்கு இழுத்து வந்து  ஜனநாயகப்படுத்தியது புரோட்டாக் கடைகள்.
காட்சி மற்றும் செவிவழி இன்பமாக, வெகுமக்களை ஈர்க்கத் தொடங்கிய திராவிட அரசியல் எழுச்சி பெற்ற காலத்தில் தான் புரோட்டாவின்  செல்வாக்கும் இங்கே தொடங்கியது.
வெகுமக்கள் திரளாக பங்கேற்க சாத்தியப்படும் இடங்களான நாடகக் கூடங்கள்,சினிமா அரங்குகள், உணவுக் கூடங்கள்  ஆகியவை உருவாகும் போதெல்லாம் பழமைவாதிகளும் மதவாதிகளும் அமைப்புகளும் அவற்றை எதிர்த்தது சரித்திரம்.
 மனிதர்கள் மகிழ்ச்சியாக இருப்பது பழைய சம்பிரதாயங்களை குலைத்து விடும். இறுக்கங்கள் தளர்ந்து காலாவதியாகிப் போன விதிமுறைகள் சந்தோஷமான மனிதர்களால் கேள்விக்குள்ளாக்கப்பட்டுவிடும்.
சந்தோஷம் மனிதனைப் புதிதாக்குவது. அது அவனை இளைஞனாக்குகிறது.  எல்லாப் பழமைவாத அமைப்புகளும்  இளைஞன் அல்லது  யுவதியையே தங்களை வெடி வைக்கக் காத்திருக்கும் சக்தியாகப் பார்க்கின்றன.
ஊரில் வேறு வேறு சாதிகளாக இருந்த தமிழக மாணவர்களிடையே இறுக்கத்தை தளர்த்தி பள்ளி மற்றும் கோவில்களுக்கு வெளியே ஒரு பொதுவெளியை சாத்தியப்படுத்தியதில் திரையரங்குகள், தேனீர்கடைகள்,முடிதிருத்தகங்களோடு  புரோட்டாக் கடைக்கும் ஒரு முக்கியப் பங்கு உண்டு.
தமிழகத்தில் 50 களின் இறுதியில் அரிசிக்குப் பஞ்சம் வந்த போது வடநாடுகளில் இருந்து கோதுமையும்,மைதாவும்  இறக்குமதி செய்யப்பட்ட போது புரோட்டா இங்கு உருவாகியிருக்க வேண்டும்.
புதிய பொருளான மைதா மாவிலிருந்து ஒரு உணவுப் பொருளை உருவாக்குவது தமிழ் கைகளுக்கு ஒரு சவாலாக இருந்திருக்க வேண்டும். பின் வெயில் அடிக்கும் கடைத்திண்ணையில் மைதா மாவைக் கொட்டி ,முட்டை உடைத்து ஊற்றி ,தண்ணீர் கலந்து, ஒரு ஜோடிக் கைகள் அதை முதல் முதலாக பிசைந்துப் பார்த்திருக்கும். அது இன்று அடைந்திருக்கும் நெகிழ்வுக்குப் பின்னணியில் பல கைகள் உண்டு.
இலங்கை,சிங்கப்பூர் நாடுகளில் தேயிலைத் தோட்டங்களில் பணிபுரிந்துவிட்டு திரும்பிய நம் தொழிலாளர்களுடன், புரோட்டாவின் முன்வடிவு  இங்கு வந்திருக்க வேண்டும் என்றும் சொல்லப்படுகிறது. பல்வேறு கலாச்சாரங்களின் குறுக்கு நெடுக்கான கிளைச்சாலைகளில் பயணம் செய்து வந்திருக்கும் புரோட்டா, இன்றும்  சாலைவழி காட்சி, ஒலி,மணத்தின் படிமமாகவே ஆகிவிட்டது. 
 இன்று காலத்தின் சிறந்த வடிவமாக நிலைபெற்று விட்டது புரோட்டா.வீச்சு ரொட்டி,புரோட்டா,பொறித்த புரோட்டா,சிலோன் புரோட்டா,கொத்து புரோட்டா என அதற்குப் பல வடிவங்கள்...மதுரை,திருநெல்வேலி,செங்கோட்டை,நாகர்கோவில்,விழுப்புரம்,உளுந்தூர்பேட்டை என வெவ்வேறு ஊர்களின் நில மன இயல்பும்,  குழம்புகளின் நிறம்,வண்ணங்களின் பன்முக தன்மையும் சேர இன்று புரோட்டா , தமிழ் மக்களின் எளிய கொண்டாட்ட வழிமுறையாகவே ஆகிவிட்டது.  
சைவ அசைவ உணவு சார்ந்து இருந்த பெரும்  சமூகப் பிரிவினைக்குள் நெகிழ்ச்சியை உருவாக்கியது புரோட்டா தான். பிறன்விழைவின் வசீகரத்தைப் போல சால்னா என்று அழைக்கப்படும் குழம்பின் மணம் அக்கிரகாரங்களிலும் சைவ வீடுகளிலும் பெரும் உடைப்பையே ஏற்படுத்தியது. இன்று சைவ வீடுகளில் , அசைவ உணவு ஏற்பை உருவாக்கியதில் புரோட்டா மிக முக்கிய பங்கு வகிக்கிறது.
கூடி உண்பது, சந்தைப்பகுதியின் வேறுபட்ட ஒளி இரைச்சல்கள் முயங்க, இரவு ஒளியில் புரோட்டா மாவைப் பிசைபவரின் முதுகு வியர்வையைப் பார்த்த படியே,பரிசாகரால் பிய்க்கப்பட்ட புரோட்டாவில் சிகப்பு நிறக் குழம்பை ஊற்றி அளைந்தபடி உண்பதிலிருந்து தொடங்குகிறது புரோட்டா என்னும் அனுபவம்.  இந்த ருசியை வீடுகளில் பெறமுடியாத  நிலையே இன்னமும் நீடிக்கிறது. வீட்டில் செய்யப்படும் புரோட்டா, கடை புரோட்டாவின் ருசியை எட்டாத மாயக்கவர்ச்சி தான் 50 ஆண்டுகளுக்குப் பிறகும் நீடிக்கும் தெவிட்டாத மர்மம்.  அதன் வசிகரமும் அது தான்.
புரோட்டா, கலாச்சாரத்தின் நுண்மடிப்புகளாலான ஒரு வெகுசனக்கதையும் கூட...

 

Comments

Popular posts from this blog

விகடன் என்னும் ஒரு பெருநிறுவனத்துக்கு எதிராக எளியவர் பச்சோந்தி பெற்றிருக்கும் வெற்றி

கரோனா என்னும் இயற்கைப் பெருந்தொற்று, இந்தியா போன்ற வளர்முக சமூகத்தில், அடிமட்டத்தில் உள்ள மக்களின் ஏற்கெனவேயுள்ள துயரங்களைக் கூட்டி, ஒரு இயற்கைப் பேரிடர்கூடக் கடைசியில் ஏழைகளது தலையிலேயே பிரமாண்டமான சுமைகளை இறக்குகிறது என்பதை மீண்டும் நிரூபித்தது. முகமூடி அணிவதையும், மனிதர்களைத் தொடாத இடைவெளியையும், அனுமதிக்கப்பட்ட தீண்டாமையையும் பணக்காரர்களும் உயர்சாதியினரும் தான் பெருந்தொற்றுக் காலத்தைச் சாதகமாக்கி இயற்கையானதாக, சௌகரியமானதாக மாற்றிக் கொண்டிருக்கின்றனர். மத்தியில் ஆளும் பாஜக அரசு தனது கொடுங்கோன்மையை, இந்தப் பெருந்தொற்றின் முகமூடியை அணிந்தே வேறு வேறு வகைகளில் குடிமக்கள் மீது இறக்கியது.      இந்தப் பெருந்தொற்று நெருக்கடியைப் பயன்படுத்திக் கொண்டு தொழிலாளர்களை வெளியேற்றி பல தொழில்துறைகளில் பத்திரிகை துறையும் ஒன்று. நாட்டில் நடக்கும் அவலங்கள், அரசியல்வாதிகளின் தகிடுதித்தங்களை எல்லாம் உரத்துப் பேசும் ஊடகங்களும், எழுதும் பத்திரிகையாளர்களுக்கும் தங்கள் உரிமைகளைப் பேசுவதற்கு இன்னமும் சரியான அமைப்போ, அவர்களது உரிமைகளைப் பாதுகாப்பதற்கான சட்டங்களோ வலுவாக இல்லாத நிலையில், இந்தியா முழுவதும் தி இந

ஒருநாள் - நகுலன்

   ஈசுவரஸ்மரணையிலேயே தன் ஸ்மரணையை உலகைவிட்டு சுழலாமல் வாழ்வை நடத்திவந்த பரமஹம்ஸரைச் சுற்றி சிஷ்யர்கள் வந்து போய்க் கொண்டிருந்தனர் . பிற்காலம் உலகப் பிரசித்தி பெற்ற நரேந்திரநாத தத்தர் , உலகறியாத  ஆ னால் பரமஹம்ஸருக்கு வேதாந்தங்களை உபதேசித்துவிட்டு விடை பெற்றுக்கொண்ட மகான் தோதாபுரி , உறவினனான இருதய முகர்ஜி பிரம்ம ஸமாஜிகளான கேசவசந்திர சேனர் , சாஸ்திரி சிவநாத பாபு , பிரதாப சந்திர முஜும்தார் , வைதிக ரத்தினமான கிருஷ்ண கிஷோர் சாதகர்களான கௌரங்கஸ்வாமி , நித்தியானந்தஸ்வாமி , வைத்தியரானசசாதரபண்டிதர் , கோடீச்வரரானயதுநாதமல்லீக் ,  ராணிராஸமணியின் மருமகனான மதுரபாபு இப்படியாகப் பலரும் பரமஹம்ஸரைப் பார்த்து அளவளாவ வந்து போய்க் கொண்டிருந்தனர் .  இவர்களுடன் பரமஹம்ஸர் முழுவிவகார ஞானத்துடன் பேசுவதை முதல் தடவையாகப் பார்ப்பவர்கள் அவர் உலகை நிராகரித்தவர் என்று சொன்னால் அதிசயப்படுவார்கள் . அவரவர் - யதுநாத மல்லிக்கிலிருந்து தோட்டி குஞ்சன் வரை -  அவரவர் தங்கள் கஷ்டங்களைச் சொல்லி , அவருடைய திருஷ்டாந்தக் கதைகள் மூலம் சாந்தி பெற்றுப் போவார்கள் . அவர்கள் எப்பொழுது போவார்கள் வருவார்கள் என்பதும் நிச்சயமில்லை .

நீலக்குதிரைகள் - மேரி ஆலிவர்

நான்கு நீலக்குதிரைகள் ஓவியத்துக்குள் நுழைகிறேன் அது சாத்தியமாவதில் எனக்கு ஆச்சரியம் கூட இல்லை. நான்கில் ஒரு குதிரை என்னை நோக்கி நடந்துவருகிறது. அதன் நீல மூக்கு என்னிடம் லேசாக நீள்கிறது. நான் எனது கையை அதன் நீலப்பிடறியில் இட்டு கட்டிக் கொள்கிறேன். என் புளகிதத்தை அது அனுமதிக்கிறது. ஓவியன் ப்ரான்ஸ் மர்க் மூளையில் வெடிகுண்டின் உலோகத்துண்டு தாக்கி இறந்துபோனான். போரென்றால் என்னவென்று அந்த நீலக்குதிரைகளுக்கு விளக்குவதை விட நான் இறந்தே விடலாம். அவை பீதியில் மயக்கம் போட்டு விழுந்துவிடும் அல்லது அதை அவற்றால் நம்பவே முடியாது. ப்ரான்ஸ் மர்க் உனக்கு எப்படி நன்றி சொல்வது. நமது உலகம் காலப்போக்கில் கூடுதலாக அன்பானதாக ஆகலாம். அழகான ஒன்றை ஆக்கும் வேட்கை நம் எல்லாருக்குள்ளும் இருக்கும் கடவுளின் ஒரு சிறு துண்டாக இருக்கலாம். இப்போது அந்த நான்கு குதிரைகளும் நெருக்கமாக வந்து ரகசியங்கள் சொல்ல இருப்பதைப் போல என்னை நோக்கி தங்கள் தலையைத் தாழ்த்துகின்றன அவை பேசவேண்டுமென்று நான் எதிர்பார்க்கவில்லை அவை பேசவும் செய்யாது. என்ன சொல்லக் கூடும் அவை இத்தனை அழகாக