திரௌபதி அம்மன் கோயில் ரேணுகா பரமேஸ்வரி

மழையும் வெள்ளமும்  பிசுபிசுக்க
வைத்திருந்த திரௌபதி அம்மன் கோயில் தெருவின்
குட்டிச்சுவரில் முந்தின நாள்
மரித்த விஸ்வநாத நாயக்கரின் சுவரொட்டிக்கு
முன்னர்
முகம் முழுக்க மஞ்சள் பூசிய ரேணுகா பரமேஸ்வரி
பதமாய் அவித்து வைத்த இட்லிகளை
நேற்று கழுவி உலரவைத்த
வெள்ளை டப்பாவில்
அடுக்கி வைத்தாள்
தெருவில் இன்னும்
சந்தடி பிறக்கவில்லை
செயற்கை நுண்ணறிவுத் திறனும்
அல்காரிதங்களும் இன்னும் பிறப்பிக்க இயலாத
அரியதும் எளியதும்
மருத்துவர்களால் இன்னும் பழிக்கவே முடியாததுமான
டப்பாவில் அடுக்கப்பட்ட இந்த இட்லிகளை
திரௌபதி அம்மன் கோயில் தெருவில் வசிக்கும்
மஞ்சள் பூசிய ரேணுகா பரமேஸ்வரியை
இந்த இருபத்தியோராம் நூற்றாண்டிலும்
விசேஷ மலர்களாக ஆக்குகிறது
சூரியன்

அந்தக் காலை அவள் இடம் அவளது உள்ளங்கை
சின்னச் சின்னப் பாத்திரங்கள்
ஒளியின் தூய்மை
அரைத்த நுரை இன்னும் நீங்கவில்லை
எண்ணெய் மின்னும்
கடுகு உளுந்து கருவேப்பிலை தாளிசத்தை
இனிமேல்தான் சட்னியின் தலையில் கொட்ட வேண்டும்.