Skip to main content

எனக்கெதற்கு பற்ற ஒரு கரம் எனக்கெதற்கு அள்ள ஒரு முகம்



இருண்ட நெடுஞ்சாலையின் விளக்குகளை

சுடரவைக்கும் உனது குரல்

ஒரு உறக்கமற்ற இரவில்தான்

எனக்குப் பரிச்சயமானது

எல்விஸ் பிரஸ்லி

‘உன்னுடன் காதலில் விழுவதைத் தவிர வேறொன்றும்

செய்யமுடியவில்லை என்பதனால்’.

 

தனிமை சூழ்ந்தறையும் இருளில்

தொலைவில் வெளிச்ச ஜன்னலாய்

ஆதுரம் காட்டும் ஒரு மாடி அறை

சற்று தூரம் கடந்தால் தொடங்கிவிடக்கூடிய

காதலின் ஆதுர நிலப்பரப்பு 

அதை நோக்கி 

நான் பயணிக்கும் மகிழுந்து 

உன் குரல் எல்விஸ் பிரஸ்லி

‘உன்னுடன் காதலில் விழுவதைத் தவிர வேறொன்றும்

செய்யமுடியவில்லை என்பதனால்’ 

‘உன்னுடன் காதலில் விழுவதைத் தவிர வேறொன்றும்

செய்யமுடியவில்லை என்பதனால்’

தசைகளெங்கும் வலியாய் கனக்கும்

தனித்த அந்த இரவில்

நேசத்தின் பாடலை ஒற்றையாகவே

பராமரிக்கும் ரகசியப் பேழையை

உன் குரலிலிருந்து பரிசாகப் பெற்றேன்

எல்விஸ் பிரஸ்லி

‘நான் இங்கே தரிக்கலாமா?

உன்னுடன் காதலில் விழுவதைத் தவிர வழியில்லாமல் போனால்

அது பாவம் ஆகிவிடுமா என்ன?’


ஒரு ராஜகூடலுக்கு இட்டுச்செல்லும்

கம்பீர நெடுஞ்சாலை 

முயக்கத்தின்போது அவள் முகத்தில்

தோன்றும் எண்ணெய் மினுமினுப்பை

வானத்திலிருந்து இறங்கும் விளக்குகளாக்கும்

உன் பாடலின் விந்தை

இருக்கும்போது 

எனக்கு எதற்கு ஒரு முன்னிலை

எனக்கெதற்குப் பற்றுவதற்கு ஒரு கரம்

அள்ளுவதற்கு ஒரு முகம்

‘உன்னுடன் காதலில் விழுவதைத் தவிர வேறொன்றும்

செய்யமுடியவில்லை என்பதற்காக’ 



(எல்விஸ் பிரஸ்லி தனது கச்சேரிகளில் இறுதியாகப் பாடும் பாடல் இது. அவரது இறுதிக் கச்சேரியிலும் பாடிய கடைசிப் பாடல் இதுதான். "Can't Help Falling In Love" பாடலிலிருந்து சில வரிகளும் இந்தக் கவிதையில் கையாளப்பட்டுள்ளது)


எல்விஸ் பிரஸ்லியின் குரலில் பாடலைக் கேட்பதற்கான இணைப்பு:

https://www.youtube.com/watch?v=vGJTaP6anOU

Comments

Popular posts from this blog

பெரியாரைப் பற்றி எழுதப்பட்ட நவீன கவிதையைப் படித்திருக்கிறாயா சங்கர்?

ஓவியம் : ராஜராஜன் எனக்குத் தெரிந்து இல்லை. அது ஆச்சரியமான விஷயம்தான். எத்தனையோ வரலாற்றுக் கதாபாத்திரங்கள் இடம்பெற்ற நவீன கவிதையில் பெரியார் பற்றி எழுதப்பட்ட கவிதை ஒன்றை இதுவரை நான் பார்த்ததில்லை. அழகுக்கும் அழகியலுக்கும் எதிரானவர் என்பதால் பெரியார் கவிதையில் இடம்பெறவே இல்லாமல் போனாரா சங்கர்? உண்மைக்கு அருகில் வரும் காரணங்களில் ஒன்றாக அது இருக்குமென்றுதான் தோன்றுகிறது. புனிதம் ஏற்றப்படாத அழகு என்று ஒன்று இருக்கிறதா? இயற்கை, கலாசாரம் உட்பட திரட்டப்பட்ட எல்லா செல்வங்களின் உபரியாகவும் பாகுபாட்டை உருவாக்குவதாகவும் அவர் கலையை கவிதையை அழகைப் பார்த்திருப்பார்தானே. அப்படியான பின்னணியில் அவர் கவிதையையும் கவிஞர்களையும் புறக்கணித்ததைப் போலவே நவீன கவிதையும் அவரைப் புறக்கணித்துவிட்டது போலும்.  அழகு ஒரு அனுபவம் இல்லையா சங்கர்? நல்ல என்று மனம் கொடுக்கும் அந்த விளக்கத்தின் வழியாக அங்கே பேதம் வந்துவிடுகிறது. அனுபவத்தின் பேதத்திலிருந்து தான் தீண்டாமை தொடங்குகிறது. அதனால்தான், தனது தடியால் அழகைத் தட்டிவிட்டு பாம்பைப் போலப் பிடித்து அடிக்க அலைந்தார் போலும் பெரியார். புதுக்கவிதை உருவான சூழலும், புதுக்கவிதைய

க்ரியா ராமகிருஷ்ணன் உருவாக்கிய புத்தக உணர்வு

தமிழில் மொழி, கலை, பண்பாடு சார்ந்த அறிவுத்துறைகளில் ஈடுபடுபவர்களின் எண்ணிக்கை தமிழகத்தின் மக்கள் தொகையை ஒப்பிடும்போது குறைவாகவே தொடர்ந்து இருந்துவருகிறது. அந்தச் சிறுபான்மை வட்டத்துக்குள் இருந்தவர்கள், இருப்பவர்கள் எல்லார் மீதும் தான் வெளியிட்ட புத்தகங்கள் மூலம் கடந்த நாற்பது ஆண்டுகளுக்கும் மேலாகத் தாக்கம் செலுத்துபவராக க்ரியா ராமகிருஷ்ணன் இருந்திருக்கிறார். நவீன இலக்கியம் தொடங்கி மொழியியல், தத்துவம், நாட்டார் வழக்காற்றியல், சினிமா, தொல்லியல், சூழியல், கானுயிரியல், மருத்துவம், ஆன்மிகம் என்று பல்வேறு அறிவுத்துறைகள் சார்ந்து தீவிரமான தேடல் உடைய தமிழர்கள் ஒவ்வொருவரும் க்ரியா வெளியிட்ட நூல்கள் சிலவற்றால் உந்துதலைப் பெற்றிருப்பார்கள். க்ரியா வெளியிட்ட அந்நியன், விசாரணை, அபாயம் போன்ற இலக்கிய நூல்களால் தாக்கம் பெற்றிருந்த லக்ஷ்மி மணிவண்ணன் வீட்டில் அவர் தொலைக்காத புத்தகங்களில் ஒன்றாக டேவிட் வெர்னர் எழுதிய ‘டாக்டர் இல்லாத இடத்தில்’ புத்தகத்தை அவரது மூத்த மகன் பிறக்கும்வரை பாதுகாத்தும் கையேடாகப் பயன்படுத்தியும் வந்தார். மூன்றாம் உலக நாட்டில் மருத்துவர் இல்லாத சூழலில், பேதி, காய்ச்சல், பிரசவம் ப

அந்த ஆலயத்தில் கடவுள் இல்லை - ரவீந்திரநாத் தாகூர்

அரச சபை ஊழியன் சொன்னான், “ராஜாவே, பணிவான வேண்டுகோள்களை விடுத்தும், மனிதர்களில் சிறந்தவரும் அருந்துறவியுமானவர், பொன்னால் நீங்கள் உருவாக்கிய ஆலயத்துக்குள் வருவதற்கு மறுக்கிறார். சாலை ஓரத்து மரத்தின் கீழே அமர்ந்து கடவுளைப் பாடிக் கொண்டிருக்கிறார். பக்தர்கள் அவரை பெரும் எண்ணிக்கையில் சூழ்ந்துள்ளனர். ஆனந்தத்தில் அவர்களிடமிருந்து பெருகும் கண்ணீரோ நிலத்திலுள்ள புழுதியை எல்லாம் கழுவுகிறது. நீங்கள் உருவாக்கிய ஆலயமோ சீந்துவார் அற்றுக கிடக்கிறது. புதரில் தனது இதழ்களை விரிக்கும் மலரின் வாசனைகண்டு பொன்முலாம் பூசிய தேன்பானையைப் புறக்கணித்து, பித்தேறிப் புதரை நோக்கி தமது தாகத்தைத் தீர்க்கப் போகும் தேனீக்கள்  போலத்தான் மக்கள். அவர்களுக்கு பொன்னால் நிறைந்த மாளிகை ஒரு பொருட்டுமில்லை. சொர்க்கத்தின் நறுமணத்தைப் பரப்பும் விசுவாசமுள்ள இதயத்தில் உள்ள மலரை நோக்கி மொய்க்கிறார்கள். ஆபரணங்களிட்டு அலங்கரிக்கப்பட்ட பீடத்தில் காலியான கோயிலில் நமது கடவுள் அமர்ந்திருக்கிறார் தனிமையில். அதைக் கேட்டு எரிச்சலுற்ற மன்னன் அரியணையிலிருந்து எழுந்து துறவி அமர்ந்திருக்கும் மரத்தை நோக்கிக் கிளம்பினார். துறவியின் முன்