Skip to main content

பல் பொம்மை போதும் ஐயா




சந்தையில் ஒரு சேவையையோ, ஒரு பொருளின் விற்பனை இங்கு நடக்கிறது என்பதையோ குறிப்பிடுவதற்கு, அந்தப் பொருளின்  உருவத்தையோ சித்திரத்தையோ கேலியாக்கியோ எல்லார் கண்ணில் படவும் விளம்பரமாக வைப்பது எந்தக் காலத்திலிருந்து தொடங்கியிருக்கும். எழுத்தும் படிப்பும் பரவலாகாத சமூகங்களில் மக்களை ஈர்ப்பதற்கு இந்த உருவங்கள் உதவியிருக்க வேண்டும்.

மருத்துவர்கள் இப்படியாக தங்கள் விளம்பரத்தை, பல்லிலிருந்துதான் தொடங்கியிருக்க வேண்டும். திருநெல்வேலி கிழக்கு ரதவீதியில், பல் மருத்துவமனையை நிறுவியிருந்த மருத்துவர் சென்னின் க்ளீனிக்கின் முன்னால், பெரிய பல்லின் உருவம் ஒன்று விளக்கொளியில், சங்கிலி பூதத்தார் சிலையைத் தாண்டினாலே தெரியத் தொடங்கிவிடும். பல்லின் உருவங்களைப் பெரிதாக மருத்துவர்கள் வைப்பது, உலகம் முழுவதும் பல நூற்றாண்டுகளாகவே இருந்து வந்திருக்க வேண்டும். குவெண்டின் டொரண்டினோ இயக்கிய ஜாங்கோ அன் செயின்ட் படத்தில், கருப்பின அடிமைகளுக்கு விடுதலை அளிப்பவராகவும், அரசாங்கம் தேடும் குற்றவாளிகளைப் பரிசுப் பணத்துக்காகக் கொல்லும் பவுண்டி ஹண்டராகவும் வரும் கிறிஸ்டோபர் வால்ட்ஸ், தனது குதிரை வண்டியின் அடையாளமாக ஸ்பிரிங்கில் ஆடும் பல்லின் உருவத்தையே வைத்துக் கொண்டு வருவார். அந்தப் பல்தான் அவரது பணத்தை வைக்கும் பெட்டியும் கூட.

 பல்வேறு வகையான சித்திரச் சாத்தியங்களுக்கு இடம்கொடுப்பதாகவும் பல் இருக்கிறது. அதில் கண்களை வரையமுடியும், மூக்கு, வாய் எல்லாம் போடமுடியும். டூத் பிரஸ் விளம்பரங்களில் பல் நடனமெல்லாம் ஆடுகிறது. 

என்னுடைய ஞாபகத்திலேயே சந்தைகளிலும் மார்க்கெட்களிலும் பிரமாண்ட பனியன் வெளியில் பறக்க, வாடிக்கையாளர்களை அழைக்கும் துணிக்கடைகளைப் பார்த்திருக்கிறேன். செருப்புக் கடைகளில் இன்னும் பெரிய செருப்புத் தட்டிகள் நடைமுறையில் இருக்கின்றன. 

திருநெல்வேலி டவுண் போஸ் மார்க்கெட்டில் மூக்குப்பொடி கடை ஒன்றில், வருடத்தில் ஒரு பருவத்தில், ஒரு ஆள் சைஸ் பொம்மை உட்கார்ந்து உரலில் பட்டணம் பொடியை உலக்கையால் அசைத்து அரைத்துக் கொண்டிருக்கும்.. தேரோட்டத்தை ஒட்டியோ தசராவை ஒட்டியா என்று ஞாபகமில்லை. 

இந்த உருவங்களும் சித்திரங்களும் வழக்கொழிவதும், திரும்ப வேறு ஏதோ ஒருவகையில் மீண்டும் புழக்கத்துக்குள் வருவதும் ஒரு சுற்றுதான் போல. 

அலைபேசி வந்தபிறகு, காட்சி வழி ஊடகங்கள் வலுப்பெற்ற பிறகு, மொழி ரீதியான தொடர்பில் நாம் உருவாக்கிய புதுமையான வடிவங்கள் எல்லாம் ஒரு எல்லையைத் தொட்டுவிட்டது போலத்தான் தெரிகிறது. 

எமோஜிக்கள், மீம்கள், வீடியோக்களே போதுமென்ற அளவில் பக்கம் பக்கமாக எழுதுவது வியர்த்தம் என்று உலகம் முழுவதும் உணரப்படும் காலம் இது. குறிப்பாக உண்மை கொண்டு மறுக்கமுடியாது வலுவாக பொய் செய்திகளையே முதலீடாகக் கொண்டு சர்வாதிகார ஆசையை நோக்கி ஒரு அரசு நகர்ந்து கொண்டிருக்கும் இந்தியா போன்ற நாடுகளில், அச்சு ஊடகத்துக்கு வேகம் வேகமாக இறுதிவிடை, தொழில்நுட்ப மாற்றம் என்ற பெயரால்தான் கொடுக்கப்பட்டு வருகிறது.

பல் மருத்துவத்தைத் தெரிவிக்க ஒரு பல்லின் வடிவமோ, பொம்மையோ இருந்தால் போதுமென்ற பாமரர்களின் ஊடகம்சார் விவேகத்துக்கு மேல், மற்ற சிந்தனைகளெல்லாம்  மாற்றங்களெல்லாம் வீண்தான் போல.

வாழைப்பழக் குடியரசு போல மாறிவரும் ஒரு இடத்தில், சிந்திப்பதற்கான விவாதிப்பதற்கான உரிமைகளைக் கேட்பதற்கான ஊடகமாக, சென்ற நூற்றாண்டில் உச்சம் கண்ட ஒரு எழுத்தை அழிப்பதுதானே அவசியமானது.  

பல் பொம்மை மட்டும் சந்தையில் இருந்தால் போதும்தானே.          

Comments

Popular posts from this blog

விகடன் என்னும் ஒரு பெருநிறுவனத்துக்கு எதிராக எளியவர் பச்சோந்தி பெற்றிருக்கும் வெற்றி

கரோனா என்னும் இயற்கைப் பெருந்தொற்று, இந்தியா போன்ற வளர்முக சமூகத்தில், அடிமட்டத்தில் உள்ள மக்களின் ஏற்கெனவேயுள்ள துயரங்களைக் கூட்டி, ஒரு இயற்கைப் பேரிடர்கூடக் கடைசியில் ஏழைகளது தலையிலேயே பிரமாண்டமான சுமைகளை இறக்குகிறது என்பதை மீண்டும் நிரூபித்தது. முகமூடி அணிவதையும், மனிதர்களைத் தொடாத இடைவெளியையும், அனுமதிக்கப்பட்ட தீண்டாமையையும் பணக்காரர்களும் உயர்சாதியினரும் தான் பெருந்தொற்றுக் காலத்தைச் சாதகமாக்கி இயற்கையானதாக, சௌகரியமானதாக மாற்றிக் கொண்டிருக்கின்றனர். மத்தியில் ஆளும் பாஜக அரசு தனது கொடுங்கோன்மையை, இந்தப் பெருந்தொற்றின் முகமூடியை அணிந்தே வேறு வேறு வகைகளில் குடிமக்கள் மீது இறக்கியது.      இந்தப் பெருந்தொற்று நெருக்கடியைப் பயன்படுத்திக் கொண்டு தொழிலாளர்களை வெளியேற்றி பல தொழில்துறைகளில் பத்திரிகை துறையும் ஒன்று. நாட்டில் நடக்கும் அவலங்கள், அரசியல்வாதிகளின் தகிடுதித்தங்களை எல்லாம் உரத்துப் பேசும் ஊடகங்களும், எழுதும் பத்திரிகையாளர்களுக்கும் தங்கள் உரிமைகளைப் பேசுவதற்கு இன்னமும் சரியான அமைப்போ, அவர்களது உரிமைகளைப் பாதுகாப்பதற்கான சட்டங்களோ வலுவாக இல்லாத நிலையில், இந்தியா முழுவதும் தி இந

ஒருநாள் - நகுலன்

   ஈசுவரஸ்மரணையிலேயே தன் ஸ்மரணையை உலகைவிட்டு சுழலாமல் வாழ்வை நடத்திவந்த பரமஹம்ஸரைச் சுற்றி சிஷ்யர்கள் வந்து போய்க் கொண்டிருந்தனர் . பிற்காலம் உலகப் பிரசித்தி பெற்ற நரேந்திரநாத தத்தர் , உலகறியாத  ஆ னால் பரமஹம்ஸருக்கு வேதாந்தங்களை உபதேசித்துவிட்டு விடை பெற்றுக்கொண்ட மகான் தோதாபுரி , உறவினனான இருதய முகர்ஜி பிரம்ம ஸமாஜிகளான கேசவசந்திர சேனர் , சாஸ்திரி சிவநாத பாபு , பிரதாப சந்திர முஜும்தார் , வைதிக ரத்தினமான கிருஷ்ண கிஷோர் சாதகர்களான கௌரங்கஸ்வாமி , நித்தியானந்தஸ்வாமி , வைத்தியரானசசாதரபண்டிதர் , கோடீச்வரரானயதுநாதமல்லீக் ,  ராணிராஸமணியின் மருமகனான மதுரபாபு இப்படியாகப் பலரும் பரமஹம்ஸரைப் பார்த்து அளவளாவ வந்து போய்க் கொண்டிருந்தனர் .  இவர்களுடன் பரமஹம்ஸர் முழுவிவகார ஞானத்துடன் பேசுவதை முதல் தடவையாகப் பார்ப்பவர்கள் அவர் உலகை நிராகரித்தவர் என்று சொன்னால் அதிசயப்படுவார்கள் . அவரவர் - யதுநாத மல்லிக்கிலிருந்து தோட்டி குஞ்சன் வரை -  அவரவர் தங்கள் கஷ்டங்களைச் சொல்லி , அவருடைய திருஷ்டாந்தக் கதைகள் மூலம் சாந்தி பெற்றுப் போவார்கள் . அவர்கள் எப்பொழுது போவார்கள் வருவார்கள் என்பதும் நிச்சயமில்லை .

நீலக்குதிரைகள் - மேரி ஆலிவர்

நான்கு நீலக்குதிரைகள் ஓவியத்துக்குள் நுழைகிறேன் அது சாத்தியமாவதில் எனக்கு ஆச்சரியம் கூட இல்லை. நான்கில் ஒரு குதிரை என்னை நோக்கி நடந்துவருகிறது. அதன் நீல மூக்கு என்னிடம் லேசாக நீள்கிறது. நான் எனது கையை அதன் நீலப்பிடறியில் இட்டு கட்டிக் கொள்கிறேன். என் புளகிதத்தை அது அனுமதிக்கிறது. ஓவியன் ப்ரான்ஸ் மர்க் மூளையில் வெடிகுண்டின் உலோகத்துண்டு தாக்கி இறந்துபோனான். போரென்றால் என்னவென்று அந்த நீலக்குதிரைகளுக்கு விளக்குவதை விட நான் இறந்தே விடலாம். அவை பீதியில் மயக்கம் போட்டு விழுந்துவிடும் அல்லது அதை அவற்றால் நம்பவே முடியாது. ப்ரான்ஸ் மர்க் உனக்கு எப்படி நன்றி சொல்வது. நமது உலகம் காலப்போக்கில் கூடுதலாக அன்பானதாக ஆகலாம். அழகான ஒன்றை ஆக்கும் வேட்கை நம் எல்லாருக்குள்ளும் இருக்கும் கடவுளின் ஒரு சிறு துண்டாக இருக்கலாம். இப்போது அந்த நான்கு குதிரைகளும் நெருக்கமாக வந்து ரகசியங்கள் சொல்ல இருப்பதைப் போல என்னை நோக்கி தங்கள் தலையைத் தாழ்த்துகின்றன அவை பேசவேண்டுமென்று நான் எதிர்பார்க்கவில்லை அவை பேசவும் செய்யாது. என்ன சொல்லக் கூடும் அவை இத்தனை அழகாக