Skip to main content

அமேசான் கிண்டிலில் ராணியென்று தன்னையறியாத ராணி


ராணியென்று தன்னையறியாத ராணி நூலை அமேசான் கிண்டிலில் வாங்க



சென்னை நெசப்பாக்கத்தில், நான் தனியாக ஒரு சிறு வீட்டை எடுத்து வாழ்ந்த இரண்டு வருடங்களில் அறிமுகமான நட்புகளும் ஆதரவாக இருந்த மனிதர்களின் முகங்களும் ஞாபகத்துக்கு வந்துபோகிறார்கள். முதன்மையானவன் ராஜகோபால். நெசப்பாக்கத்தில் மேற்கொண்ட தனிவாழ்க்கையில் தான் நண்பராக ரஃபீக் அறிமுகமானார். ஹஸீன், செல்வம், சுப்ரமணியன், சி. மோகன், சந்தோஷ், சிவா எல்லாரும் வயது பேதங்களின்றி சில வாரங்கள் டிபன்ஸ் காலனி மைதானத்தில் சேர்ந்து ஒரு கிரிக்கெட் டீமை அமைத்து விளையாடிய ஆற்றல் இந்தக் கவிதைகளிலும் சிந்தியுள்ளது. கவிஞர் விக்ரமாதித்யன் ஒரு ஆண்டு அளவுக்குக் கூடவே இருந்தார். தளவாய் வந்து வந்து போய்க் கொண்டிருந்தான். 

நெசப்பாக்கம் வீட்டில் தான், இரண்டு ஜோடி தங்க மீன்களை வளர்த்துப் பிரியத்துடன் அவற்றைப் பராமரிக்கவும் செய்தேன். திரும்ப வேளச்சேரி வந்த பிறகும் அவை என்னுடன் நான்கு ஆண்டுகள் தொடர்ந்தன. தங்கமீனின் உடலை விட நீளமாக வளர்ந்த சிறகு போன்ற வாலை பார்த்து அமைதிகொண்டிருக்கிறேன். இந்தக் கவிதைகள் அந்தத் துடிக்கும் வாலைப் போன்றவை. 

த சன்டே இந்தியன் இதழில் அப்போது பணியாற்றினேன். ஆசிரியர் என். அசோகனும் சுந்தர புத்தனும் செய்த உதவியும்தான் அது. இத்தொகுப்பில் சில கவிதைகள் எழுதப்பட்ட காலத்தில் ஆனந்த விகடனில் பிரசுரமாகிக் கூடுதல் கவனத்தையும் பெற்றன. என் அம்மா அந்தக் கவிதைகள் வெளியான இதழ்களை ஆசையோடு பாதுகாத்தார்.


ராஜகோபாலுடன் 


 இந்தக் கவிதைகளில் நான் சில கனவுகளையும் நம்பிக்கைகளையும் புதைத்திருந்தேன். அவை வெறும் கனவு, வெறும் நம்பிக்கை என்றே எழுதியபோது நினைத்தேன். அவற்றில் சில பின்னர் நிறைவேறின. அந்தக் கவிதைகளைப் படிக்கும்போது கவிதை தொடர்பிலும் வாழ்க்கை தொடர்பிலும் கூடுதலாக நம்பிக்கை கொள்ளலாம் என்று இப்போது தோன்றுகிறது. இந்த முன்னுரையை எழுதி முடித்தபோது, கிடைக்கவே கிடைக்காது என்று நினைத்திருந்த சில பழைய புகைப்படங்களைப் பற்றி தளவாயிடம் கேட்டபோது அவனிடம் பத்திரமாக வைத்திருந்ததை அனுப்பிவைத்தான். தொலைந்தவை என நினைத்தவற்றில் சிலவாவது திரும்பும் என்ற நம்பிக்கையை அந்தப் புகைப்படங்கள் அளித்தன.

எனது தனிக்கவிதைத் தொகுதிகளில் உள்ளடக்க வளமை கொண்ட தொகுதி இதுவென்று இப்போது தோன்றுகிறது. மிகுந்த அநாதை நிலையை, இன்மையை, இன்மைகளை உணர்ந்த காலங்களில் தான், பிடிவாதத்துடனும் கனவுடனும் உயிர்ப்புடனும் இருக்கிறேன், இருந்திருக்கிறேன் என்பதை இந்தத் தொகுப்பின் கவிதைகள் திரும்ப ஞாபகமூட்டுகின்றன. 2011-ம் ஆண்டில் நற்றிணை பதிப்பகம் சார்பில் வெளியானது. நற்றிணை யுகனிடம் என்னை ஆற்றுப்படுத்தியவர் பிரபஞ்சன்.  


இத்தொகுதியை ராஜகோபாலுக்குச் சமர்ப்பணம் செய்தேன். அவரவர் தனிமையைச் சேர்த்து மதுவாகக் குடித்துக் களித்த நாட்கள் அவை. அவன் திருமணமாகி ஓர் அமைதியான இல்லறத்துக்குள் சற்றே தூரத்தில் உள்ளான்.

அவனுக்கே இந்த அமேசான் கிண்டில் பதிப்பும் சமர்ப்பணம். இத்தொகுதியில் உள்ள கவிதைகளின் அழகையும் கனவையும் பிரதிபலிக்கும் ஓவியத்தை சண்முகம் வரைந்துள்ளார். அவருக்கு எனது சிறப்பு நன்றி. அமேசான் கிண்டில் வழியாக எனது புத்தகங்களைக் கொண்டு வருவதற்கு ஆலோசனை சொன்ன கவிஞர் இசைக்கும், செந்தில்குமாருக்கும் எனது எப்போதைக்குமான நன்றி.

Comments

Popular posts from this blog

க்ரியா ராமகிருஷ்ணன் உருவாக்கிய புத்தக உணர்வு

தமிழில் மொழி, கலை, பண்பாடு சார்ந்த அறிவுத்துறைகளில் ஈடுபடுபவர்களின் எண்ணிக்கை தமிழகத்தின் மக்கள் தொகையை ஒப்பிடும்போது குறைவாகவே தொடர்ந்து இருந்துவருகிறது. அந்தச் சிறுபான்மை வட்டத்துக்குள் இருந்தவர்கள், இருப்பவர்கள் எல்லார் மீதும் தான் வெளியிட்ட புத்தகங்கள் மூலம் கடந்த நாற்பது ஆண்டுகளுக்கும் மேலாகத் தாக்கம் செலுத்துபவராக க்ரியா ராமகிருஷ்ணன் இருந்திருக்கிறார். நவீன இலக்கியம் தொடங்கி மொழியியல், தத்துவம், நாட்டார் வழக்காற்றியல், சினிமா, தொல்லியல், சூழியல், கானுயிரியல், மருத்துவம், ஆன்மிகம் என்று பல்வேறு அறிவுத்துறைகள் சார்ந்து தீவிரமான தேடல் உடைய தமிழர்கள் ஒவ்வொருவரும் க்ரியா வெளியிட்ட நூல்கள் சிலவற்றால் உந்துதலைப் பெற்றிருப்பார்கள். க்ரியா வெளியிட்ட அந்நியன், விசாரணை, அபாயம் போன்ற இலக்கிய நூல்களால் தாக்கம் பெற்றிருந்த லக்ஷ்மி மணிவண்ணன் வீட்டில் அவர் தொலைக்காத புத்தகங்களில் ஒன்றாக டேவிட் வெர்னர் எழுதிய ‘டாக்டர் இல்லாத இடத்தில்’ புத்தகத்தை அவரது மூத்த மகன் பிறக்கும்வரை பாதுகாத்தும் கையேடாகப் பயன்படுத்தியும் வந்தார். மூன்றாம் உலக நாட்டில் மருத்துவர் இல்லாத சூழலில், பேதி, காய்ச்சல், பிரசவம் ப

பெரியாரைப் பற்றி எழுதப்பட்ட நவீன கவிதையைப் படித்திருக்கிறாயா சங்கர்?

ஓவியம் : ராஜராஜன் எனக்குத் தெரிந்து இல்லை. அது ஆச்சரியமான விஷயம்தான். எத்தனையோ வரலாற்றுக் கதாபாத்திரங்கள் இடம்பெற்ற நவீன கவிதையில் பெரியார் பற்றி எழுதப்பட்ட கவிதை ஒன்றை இதுவரை நான் பார்த்ததில்லை. அழகுக்கும் அழகியலுக்கும் எதிரானவர் என்பதால் பெரியார் கவிதையில் இடம்பெறவே இல்லாமல் போனாரா சங்கர்? உண்மைக்கு அருகில் வரும் காரணங்களில் ஒன்றாக அது இருக்குமென்றுதான் தோன்றுகிறது. புனிதம் ஏற்றப்படாத அழகு என்று ஒன்று இருக்கிறதா? இயற்கை, கலாசாரம் உட்பட திரட்டப்பட்ட எல்லா செல்வங்களின் உபரியாகவும் பாகுபாட்டை உருவாக்குவதாகவும் அவர் கலையை கவிதையை அழகைப் பார்த்திருப்பார்தானே. அப்படியான பின்னணியில் அவர் கவிதையையும் கவிஞர்களையும் புறக்கணித்ததைப் போலவே நவீன கவிதையும் அவரைப் புறக்கணித்துவிட்டது போலும்.  அழகு ஒரு அனுபவம் இல்லையா சங்கர்? நல்ல என்று மனம் கொடுக்கும் அந்த விளக்கத்தின் வழியாக அங்கே பேதம் வந்துவிடுகிறது. அனுபவத்தின் பேதத்திலிருந்து தான் தீண்டாமை தொடங்குகிறது. அதனால்தான், தனது தடியால் அழகைத் தட்டிவிட்டு பாம்பைப் போலப் பிடித்து அடிக்க அலைந்தார் போலும் பெரியார். புதுக்கவிதை உருவான சூழலும், புதுக்கவிதைய

அந்த ஆலயத்தில் கடவுள் இல்லை - ரவீந்திரநாத் தாகூர்

அரச சபை ஊழியன் சொன்னான், “ராஜாவே, பணிவான வேண்டுகோள்களை விடுத்தும், மனிதர்களில் சிறந்தவரும் அருந்துறவியுமானவர், பொன்னால் நீங்கள் உருவாக்கிய ஆலயத்துக்குள் வருவதற்கு மறுக்கிறார். சாலை ஓரத்து மரத்தின் கீழே அமர்ந்து கடவுளைப் பாடிக் கொண்டிருக்கிறார். பக்தர்கள் அவரை பெரும் எண்ணிக்கையில் சூழ்ந்துள்ளனர். ஆனந்தத்தில் அவர்களிடமிருந்து பெருகும் கண்ணீரோ நிலத்திலுள்ள புழுதியை எல்லாம் கழுவுகிறது. நீங்கள் உருவாக்கிய ஆலயமோ சீந்துவார் அற்றுக கிடக்கிறது. புதரில் தனது இதழ்களை விரிக்கும் மலரின் வாசனைகண்டு பொன்முலாம் பூசிய தேன்பானையைப் புறக்கணித்து, பித்தேறிப் புதரை நோக்கி தமது தாகத்தைத் தீர்க்கப் போகும் தேனீக்கள்  போலத்தான் மக்கள். அவர்களுக்கு பொன்னால் நிறைந்த மாளிகை ஒரு பொருட்டுமில்லை. சொர்க்கத்தின் நறுமணத்தைப் பரப்பும் விசுவாசமுள்ள இதயத்தில் உள்ள மலரை நோக்கி மொய்க்கிறார்கள். ஆபரணங்களிட்டு அலங்கரிக்கப்பட்ட பீடத்தில் காலியான கோயிலில் நமது கடவுள் அமர்ந்திருக்கிறார் தனிமையில். அதைக் கேட்டு எரிச்சலுற்ற மன்னன் அரியணையிலிருந்து எழுந்து துறவி அமர்ந்திருக்கும் மரத்தை நோக்கிக் கிளம்பினார். துறவியின் முன்